بئینیمی جراحی ائدیرم

بئینیمی جراحی ائله ییرم
ب حرفینی ایچری دن چیخاردیرام
باشماق لاری خاطیرلادیر منه ب حرفی
اؤلولر گئدن لر دن داها وفالی دی
آخیرده بیر ن حرفی گؤرورم
بیر کیشی نه قدر دایانا بیلسه او قدر ظالیم دی کلمه لر
بیر ساعت دیر قوردالانیرام بروکا بؤلگه سینده
کرپیج لری داراییرام
پیشیک لر له قارقالار یولداش دی گؤرورم
یوزلر روشوه ت سونوجو دو رابطه لر
قیرمیزی جیزیق چکیرم اؤیرنجی لریمین دؤوره سینه
ناققیش - ناققیش دعا قیلیرام خیابانلاردا
صراف اولموشام
ایلدیریم وورور بوتون قارا پول لاریما
زامانی باببالاییرام
بئینیمی جراحی ائله ییرم
قارپیز کسدیم ییین یوخ
اون بئش باشا قارپیز چیتلاییریق حافیظه مده
آی نئجه محرم اولا بیلر دلی لرین ساچینا سورورام؟
اولاییرام
آتدیم -آتدیم گئنیشله ییر احوالیم
ماشین لار قویونلاری باسیر چتین لشدیکجه اختیار
تبریزده داها چوخ غریبسه میشم
پاریس ده ده
بئینیمی جراحی ائدیرم
سئوگیلی لریم بیر- بیر بوشقابا دوزولور
سای ها سای 17 یاشیم اولور
25
45
مین ساعت دی قوردالانیرام آت قویروغو بؤلگه سینده
ساز قاییریرام ماهنی اوخوماغا
چاپیرام بئینیمی
چاپا چاپ دی
خشیل پیشیریرم
لاپ سن دیین کیمی بئینیمی الیمده ساخلاییرام
زیبیل لری یئل داغیتدیقجا بیراز دا خایین اولور میلچک لر
ال آتسام کیشی لر عادیل دیر
ال گؤتورسم آروادلار
پیچاق وورسام کیشی لر قاتیل دیر
اؤپوش وئرسم آروادلار

من شهر ساعات...