قوروسون دؤشونده کی سود

گلیشین خطرلی بیر بومبادیر
گلمه
گولوشون ایچیمه سیزان امکدار جاسوس دور
گولمه
دوروشون قاتیلیمین قانشاریمدا اوتوروشودور
دورما
ایسته ییرم:
مین ایل اولسون گئتدییینین ایل دؤنومو
ایسته ییرم:
چوروسون بوتون اکدییین آغاجلار
ایسته ییرم:
قوراقلیق دوشسون اومودلارینا
باخسان:
دونن کی آدام دییلم ، سلاملاریم چوروموش
باخسان:
قابیرقامین آلتینا ایلان اکدیرمیشم ، بارماقلارینی سانجا بیلر
باخسان:
قانونون دا عدالتینه شوبهه دوغورام دالبادال
دؤولت قورموشام خلوت اوتاغیمدا
دیوان دی
عدالتیم :
علی نین عدالتی دیر گیله
دوستومو اؤلدورمه یه تشبث ائیله ین قاتیل
دوشمنلری ائوین یوخاری باشیندا اگلشدیرن سفره
گله جک میسن؟
گلیشین ان بؤیوک توهین دیر آیاقلارینا
گولوشون ان بؤیوک خیانت دیر باخیشلارینا
دوروشون گئتمه یینی استهزا یا توتان غروروم دو
دانلاماق ایسته ییرم سنی
قارقا صفت لی انسان دا دئمک ایسته میرم عادتینه
دیالئکتیک لی اخلاقسیزلیق دی بویوروب سنی
بئینینی ایکی یه بؤلونموش دبری ین جمدک دئسم غلو ائتمه میشم
خمیر ده اولسان خوشوم گلدییینی قاییرمایاجاغام سندن
شرابینی سوزمه یه جه یم قیرخ ایلین اوزومو ده اولسان دببه م دن
و
اوغلوم اولسا قارنیندا
قوروسون دؤشونده کی سود

من شهر ساعات...