آوتو ایسکوپ

بعضی قارانلیق لاری ایشیق لار لا دا اؤلدورمک اولمور

بعضی دوشمان لاری دوستلارلا دا

و بعضی یاشلاردا اینسان یئتمیش ایللیک صغیر دی ، صغیر

ندن سه یالقیز باشینا آتوبانلاردا یئریمک دی ایشیمیز

یالقیز باشینا دوشونوب یورولماق

و یالقیز باشینا بوتون شهرلری قورتوملاییب حیاتی آنلاماقلا اویناماق

گمی گلدی یان گلدی

ایچینده مین جان گلدی

یئددی میلیاردلیق دونیادا وطن حسرتی چکدیک

گؤزلریمیز آغلاماق کانی دی

اورک لریمیز دوستلوق کانی

و ایچیمیزده اؤلمه ین بیر محبت

نه تیره ن کوپه لرینده اونودولور

نه مئترو دایاناجاقلاریندا

نه ده تئرمیناللاردا گیجه لیرکن عاغلیمیزدان چیخیر بو معنا

بعضا گئچیجی درمان دی دردیمیز

بعضا ابدی

اؤزومه اوزاقدان باخاندا گوله سیم گلیر

اؤزومه یاخیندان باخاندا آغلایاسیم

اؤزومه اوزاقدان باخاندا آفریقاداکی آجام

اؤزومه یاخیندان باخاندا آوروپادا کی عیاش

اؤزومه اوزاقدان باخاندا دووارداکی توراتانلارا موقابیلم

اؤزومه یاخیندان باخاندا یونانداکی آریستوتئلئس

عزیزینم یانقین وار

مئشه لرده یانقین وار

دونیامیزین عاقیبتی منی قورخودور

باشیمدا عاغلیمی وار سایارسامدا اللریمده بیر نئچه میثقال حرارت دی منی یاندیران

سنی نه چوخ آنلاییرام ائی گنجعلی صباحی

سنی نه چوخ آنلاییرام ائی محمدی بی ریا

سنی نه چوخ آنلاییرام ائی جابیر

من شهر ساعات...